chali khirad ki na kuchh aagahi ne sath diya
rah-e-junun mein faqat be-khudi ne sath diya

shab-e-firaq ki zulmat mein gham ke maron ka
tere khayal ki tabindagi ne sath diya

tamam raat tarashe hasin hasin paikar
tamam raat fan-e-azari ne sath diya

agar zaban se bayan haal-e-gham na ho paya
huzur-e-dost meri khamushi ne sath diya

gurez aur tere daman se wo to khair hui
mere khulus ki pakizgi ne sath diya

hum aur aap se izhaar-e-arzu karte
ye kahiye shauq ki waraftagi ne sath diya