chaman chaman na rahega jo teri bu na rahe
main us khayal se darta hun jis mein tu na rahe

jo tera aks bhi mujh ko nasib ho jae
meri talash mukammal ho justuju na rahe

ye aarzu hai ki tujh sa tamam duniya mein
siwae mere koi aur hu-ba-hu na rahe

khulenge dil ke dariche suhane mausam mein
is intizar mein na-kaam aarzu na rahe

jo zindagi ko zara bhi sukun aa jae
to roz-o-shab ki musalsal ye haw-hu na rahe

ye baat mere yaqin ke khilaf hai 'tashna'
kisi mahaz pe tu aur surkh-ru na rahe