chaman mein guzri ki sahra ke darmiyan guzri
tumhaari yaad se khali magar kahan guzri

fasana umr-e-do-roza ka mukhtasar ye hai
haram se dur jo guzri bahut garan guzri

hayat yun to guzar hi gai guzarni thi
tumhaare shauq mein lekin na raegan guzri

khula hai ghuncha-dil har gharib-o-be-kas ka
nasim ku-e-madina jahan jahan guzri

use nasib hui neamat-e-wila-e-nabi
jahan se 'tahniyat' is tarah shadman guzri