chaman walon se barq-e-be-aman kuchh aur kahti hai
magar meri to shakh-e-ashiyan kuchh aur kahti hai

nazar mein us ki yun to sab ki hi raftar hai lekin
mere qadmon se gard-e-karwan kuchh aur kahti hai

yahan ka zarra zarra mahshar-e-gham hai haqiqat mein
ba-zahir raunaq-e-bazm-e-jahan kuchh aur kahti hai

hai un ki hi nazar aaina-e-dair-o-haram lekin
yahan kuchh aur kahti hai wahan kuchh aur kahti hai

kisi din sath chhut jaane ka khatra hai use shayad
tere gham se meri umr-e-rawan kuchh aur kahti hai

yahi tum ko yaqin kyon hai ki koi iltija hogi
suno to meri chashm-e-khunfishan kuchh aur kahti hai

mujhe apni sadaqat par bhi shak hai is zamane mein
ki dil kuchh aur kahta hai zaban kuchh aur kahti hai

jahan mein go nahin aasar kuchh aise qayamat ke
magar gumrahi-e-ahl-e-jahan kuchh aur kahti hai

kabhi 'kaif' is ka loha mante the lucknow wale
magar ab ahl-e-dehli ki zaban kuchh aur kahti hai