chand jab meri chhat pe aata hai
har diye ko gale lagata hai

jaur-o-zulm-o-sitam ki zulmat mein
sabr ka jugnu jagmagata hai

gham ke suraj ki tez kirnon se
dil ka talab sukh jata hai

nind ud jati hai siyasat ki
jab qalam inqalab lata hai

kya qarib aa gai meri manzil
kyon qadam mera dagmagata hai

wo mera aks-e-eatibar hai jo
teri aankhon mein jhilmilata hai

kaun har roz dard ka gul-dan
ashk ke phulon se sajata hai

kis ne tute dilon ko jod diya
shahr mein kis ko fan ye aata hai

apne darbar mein 'qamar' baadal
roz dariya ko kyon bulata hai