chand khud ko dekh kar sharmaega
baadalon ki ot mein chhup jaega

yun udasi mein na tu is ko guzar
umr bhar is sham ko pachhtaega

aankh khulte hi wo dhundhega mujhe
khwab aisa us ko mera aaega

chal tu kitna bhi saliqe se magar
raston mein thokaren to khaega

raundta hai aaj jo is khak ko
ek din wo khak mein mil jaega

gunguna ke dekh tu bhi ye ghazal
lai mein is ki dubta hi jaega