chand ne aaj jab ek nam liya aakhir-e-shab
dil ne khwabon se bahut kaam liya aakhir-e-shab

hae wo khwab ki tabir se sarshaar bhi tha
us ki aankhon se jo inam liya aakhir-e-shab

hae kya pyas thi jab us ke labon se main ne
muskuraata hua ek jam liya aakhir-e-shab

main jo girta bhi to qadmon mein usi ke girta
us ne khud badh ke mujhe tham liya aakhir-e-shab

zindagi bhar ki masafat ka mudawa kahiye
us ki bahon mein jo aaram liya aakhir-e-shab