charagh ghar mein jala nahin hai
ye raat ka masala nahin hai

ye raat tum se nahin kategi
ye hijr hai rat-jaga nahin hai

dalil mantiq nahin chalegi
ye ishq hai falsafa nahin hai

ye ishq hai bandagi samajh mat
tu aadmi hai khuda nahin hai

hai ranj kyon haal-e-dil pe aakhir
ye qissa tu ne suna nahin hai

khud apne dushman hain log sare
nahin koi dusra nahin hai

hawa se lau tharthara gai thi
charagh lekin bujha nahin hai