chashm-e-ulfat ajib hoti hai
mujh se har shai qarib hoti hai

baat jab badh gai mohabbat mein
apni hasti raqib hoti hai

jis ko chahe na koi duniya mein
us ki duniya ajib hoti hai

aisa hota hai yaad kuchh bhi nahin
yun bhi yaad-e-habib hoti hai

samne wo hon aur baat na ho
wo ghadi bad-nasib hoti hai

un ki baaton se zakhm kha ke mujhe
ek masarrat nasib hoti hai

mujh ko jhuti tasalliyan to na do
dil ki haalat ajib hoti hai

qalb-e-sayyaad ke liye tufan
fursat-e-andalib hoti hai

hijr mein maut hi nahin 'shamsi'
zindagi bhi qarib hoti hai