chehre dhuan dhuan hain ye aasar dekh kar
aaina-e-khulus sharar-bar dekh kar

phir koi kuchh na bol saka kuchh na kar saka
us be-zaban ki jurat-e-izhaar dekh kar

kuchh aur tez ho gai lamhon ki sakht dhup
thahre jahan bhi saya-e-diwar dekh kar

raste mein koi mod na koh-e-giran mila
main laut aaya rah ko hamwar dekh kar

wo manzar-e-shikasta ki dil dubne laga
aankhen laraz gain pas-e-diwar dekh kar