chhup kar na rah sake nigah-e-ahl-e-fan se hum
mahfil mein jhankte hain naqab-e-sukhan se hum

kam-bakht dhundhti hai mohabbat mein falsafa
tang aa gae hain aql ke diwana-pan se hum

talkhi-e-zindagi mein bhi pane lage mithas
aajiz hain apni fitrat-e-kaam-o-dahan se hum

paida kiya hua hai hamara hi sab farogh
begana kuchh nahin hain teri anjuman se hum

ai mahw-e-naz aur naya koi imtihan
ukta gae hain bazi-e-dar-o-rasan se hum

ek zarra hi sahi magar ai aaftab-e-naz
sajde kara rahe hain teri har kiran se hum

dete rahe fareb-e-manazir ke but-kade
dekha kiye tujhe nigah-e-but-shikan se hum

uthna hamara tha ki sabhon ki nazar uthi
kuchh jaise le chalun hun teri anjuman se hum

ubhra nahin hai sadgi-e-girya ka mazaq
mahfil ye chahti hai ki roen bhi fan se hum