chupke chupke yaad ye kis ki aai hai
dard mein dubi aaj meri tanhai hai

jis ne kiya barbaad hamare gulshan ko
ghair nahin hai wo apna hi bhai hai

kaun hai apna kaun paraya kaisi wafa
sach kahne mein apni hi ruswai hai

apni gharaz ke bande hain sab log yahan
sab ka maqsad jag mein khud-arai hai

kis ki hui hai jo teri meri hogi
ye duniya to yug yug se harjai hai

laut ke pichhe jaana bhi hai na-mumkin
aage dushman pichhe gahri khai hai

unchi unchi baaten kyon karta hai 'majid'
sasti shohrat ka tu bhi shaidai hai