dard se chur hua jata hai
zakhm nasur hua jata hai

lut kar chain-o-sukun chal dena
un ka dastur hua jata hai

jis tarah tha wo mere dil ke qarib
utna hi dur hua jata hai

raat gahwara-e-zulmat thi magar
din bhi be-nur hua jata hai

main to musa bhi nahin lekin wo
jalwa-e-tur hua jata hai

khud-numai ki hawas mein insan
kitna majbur hua jata hai

pahle badnam-e-zamana tha 'majid'
ab to mashhur hua jata hai