chura raha hai khazane na aaj kal se mere
ye duzd-e-umr taaqub mein hai azal se mere

ye kaj-ada mujhe achchhe dinon se jaanti hai
bade marasim-e-dairina hain ghazal se mere

dikha dikha ke nae manzaron ka khali-pan
darakht hath milate hain dast-e-shal se mere

wo aankh so gai wo chandni bhi ruth gai
mukalme na mukammal hue kanwal se mere

chhabeli le gai yaron ko kyon pas-e-mahtab
gile ghazab ke hain doshiza-e-ajal se mere