dam junun ki had-e-intiha pe thahra hai
ye mera dil hai abhi ibtida pe thahra hai

usi ke lams se aab-o-hawa badalti hai
tamam manzar-e-jaan ek ada pe thahra hai

kanar-e-kun se pare hai kahin wajud apna
ye karwan to ghubar-e-sada pe thahra hai

kuchh aur der numaish hai shor-o-shar ki yahan
ye ek habab hai mauj-e-fana pe thahra hai

shua-e-subh bun-e-gosh mein utarti hai
zawal-e-mehr ki dast-e-hina pe thahra hai

shab-e-siyah sar-e-khal mein simatti hai
sitara tut ke band-e-qaba pe thahra hai

nafas nafas mein bhadakti hai dil ki lau 'sarmad'
ajab charagh hai ye baam-e-hu pe thahra hai