daman pe jam ke rah gai ya aastin par
tapki na ek bund lahu ki zamin par

insaniyat ke dars ki takmil ho gai
aaega ab na koi payambar zamin par

aandhi tawahhumat ki kis zor ki chali
udne lagi hai dhul faza-e-yaqin par

aib-o-hunar parakhne ka jis ko shuur hai
aae na pyar kyon mujhe us nukta-chin par

phuti tere labon ke tabassum se jo kiran
chamki lakir ban ke sahar ki jabin par

ujda to phir basa na kabhi qasr-e-dil mera
viraniyon ka saya hai ab shah-nashin par

guzra hazar talkhi-e-haalat se magar
ubhri koi shikan na 'asar' ki jabin par