dar ke wo baat se apni jo mukar jaega
ek khanjar mere sine mein utar jaega

ek zara raat kate subh ka suraj nikle
dhup ke rang mein har phul nikhar jaega

jism jal jaega haddi bhi chatakh jaegi
waqt ke sath hi sab rang utar jaega

un ki aankhon mein abhi tesha-e-suraj bhi nahin
abr utthega to jismon pe bikhar jaega

phirte dekhega mujhe shahr mein aawara agar
le ke mayusi ka ehsas wo ghar jaega