barson tap-e-alam ke shoalon mein tapa hun
jab ja ke main khurshid-e-jahan-tab bana hun

kal jada-e-hasti ka main khud rah-numa tha
aaj apni hi hasti ka pata puchh raha hun

kal tak tha ziya-bar tumhein yaad to hoga
ye man liya aaj main bujhta sa diya hun

hairat ki hai ye baat ki tanwir-e-sahar mein
main aaj sitaron ki tarah dub raha hun

duniya ki haqiqat ko wo samjhega bhala kya
jis ko nahin ma'lum ki main kaun hun kya hun