dar khol ke mat jhankna hamdam mere andar
uth jata hai aahat pe bhi matam mere andar

gunje hain abhi tak kisi maqtul ki chikhen
qaem hai abhi khauf ka aalam mere andar

main zad mein fasadon ki ek aaya hua ghar hun
har chiz hai ab darham-o-barham mere andar

ab koi khushi mujh mein panapti hi nahin hai
aaseb ki surat hai tera gham mere andar

main hijr ka mara hun so hota hai har ek sham
suraj ki judai pe bhi matam mere andar