dar-o-bast-e-anasir para para hone wala hai
jo pahle ho chuka hai phir dobara hone wala hai

guman-e-mahr mein ye baat hi shayad nahin hogi
huwaida khak se bhi ek sharara hone wala hai

kinara kar na ai duniya meri hast-e-zabuni se
koi din mein mera raushan sitara hone wala hai

pighalne ja raha hai phir se bahr-e-munjamid koi
samundar hi samundar ka kinara hone wala hai

bahut makhfi jise rakkha gaya tha chashm-e-imkan se
abhi kuchh din mein us ka bhi nazara hone wala hai

hamin hain us ki ninden aur hamin us ke nigahban hain
hamare khwab par kis ka ijara hone wala hai

wahi 'tariq'-naiim ab is qafas ke bab kholega
kisi ki aankh se jo ek ishaara hone wala hai