kya khabar thi koi ruswa-e-jahan ho jaega
kuchh na kahna bhi mera husn-e-bayan ho jaega

apne diwane ka tum josh-e-junun badhne to do
aastin daman gareban dhajjiyan ho jaega

aashiq-e-jaan-baz hain hum munh na modenge kabhi
tum kaman se tir chhodo imtihan ho jaega

tuti phuti qabr bhi kar do barabar shauq se
ye bhi apni be-nishani ka nishan ho jaega

shadyane baj rahe hain aaj jis ja 'naz' kal
dam zadan mein dekh lena kya saman ho jaega