darakht ab kis ka rasta dekhte hain
musafir manzilon ke ho gae hain

khuda jaane hui hai baat kaisi
mukhalif sab ke sab apne hue hain

wahan to ishq hai ek khel goya
yahan to jaan ke lale pade hain

kahin gunja hai koi qahqaha kya
fazaon mein bhanwar se pad rahe hain

isi duniya mein hain kitni hi duniya
sabhi ke apne apne masale hain

hamare zehn to mafluj the hi
hamare dil bhi patthar ho gae hain

dariche band darwaze muqaffal
bayaban ke magar raste khule hain

kahan 'faruq' raushan khwab honge
hamari aankhon mein to ratjage hain