dard aakhir dard hai aah-o-fughan hoga zarur
aag lagti hai jahan par bhi dhuan hoga zarur

main zamane se zamana mujh se barham hai magar
ek din apna zamin-o-asman hoga zarur

lakh lahraati rahen ye bijliyan chaaron taraf
andaliban-e-chaman ka aashiyan hoga zarur

azm-e-mohkam shart hai rakht-e-safar mein rah-rau
nazd-e-manzil ek din ye karwan hoga zarur

kaun tha jo fikr-e-alam par achanak chha gaya
ho na ho koi hamare darmiyan hoga zarur

qabl is ke har qadam aage badhe ye soch kar
sar jahan tuta hai diwana wahan hoga zarur

jaeza lete raho 'hamdam' kitab-e-zist ka
aane wala kal tumhaara imtihan hoga zarur