dard-e-jigar kisi ko bataya na jaega
ye dagh chaaragar ko dikhaya na jaega

ehsan kar ke aap to farigh hue janab
ye bar-e-lutf hum se uthaya na jaega

dil ko to rok lenge nigahon ka kya karen
hum se to raaz-e-'ishq chhupaya na jaega

rakh panw rah-e-shauq pe sau bar soch kar
is rahguzar se laut ke aaya na jaega

toda jinhon ne dil mera apne hi log the
ye hadisa kisi ko bataya na jaega

yaadon ko apni dil mein mere rahne dijiye
ghar ye ujad gaya to basaya na jaega

nukta-rason ki bhid hai darta hun ai 'sada'
mahfil mein aisi she'r sunaya na jaega