dard ho ya gham ata ho kuchh to ho
ya khushi ki intiha ho kuchh to ho

ghut raha hai dam daricha khol do
thodi si taza hawa ho kuchh to ho

phir wahi lutf-o-karam darkar hai
aarzi ya der-pa ho kuchh to ho

chha na jae yun andhera phir kahin
raushni ko ek diya ho kuchh to ho

dad ya bedad jo hai de hi do
wo karam ho ya saza ho kuchh to ho

ya karen gharqab apne hath se
ya sahaara aap ka ho kuchh to ho

phir mohabbat ki nazar se dekhiye
phir wahi pahli khata ho kuchh to ho

dard-e-dil ko bas shifa matlub hai
ab dawa ho ya dua ho kuchh to ho