dard ka gahra samundar aur main
zindagi ka sar pe patthar aur main

is taraf shishe hi shishe aur wo
us taraf patthar hi patthar aur main

hai yahi ahd-e-junun ki yaadgar
ek kucha ek patthar aur main

tut jaane ko hain sab jam-o-subu
ek laghzish ek thokar aur main

ban gaya tarikh ka khunin waraq
pusht mein paiwast khanjar aur main

ye musallas ahd ki tarikh hai
ek qatil ek khanjar aur main

ye musallas dekh kya lata hai rang
mera sar mera hi patthar aur main