dard ke khet mein muskan ugane wala
kitna khush-zarf hai zakhmon ko chhupane wala

dil mein ikhlas wafaon ki hai gathri sar par
aadmi hai ye kisi aur zamane wala

yaad aata raha ta-der safar mein mujh ko
hath rah rah ke dariche se hilane wala

aag kuchh aur gharon ko bhi jala dalegi
sochta kash mere ghar ko jalane wala

log chehron ko chhupate hue phirte hain 'nadim'
shahr mein aaya hai aaina dikhane wala