lag gae barson jawabaat batane ke liye
in khurafat ko ghar ghar se hatane ke liye

kis qadar zahr piya zabt kiya hai main ne
jo lagi aag hai sine mein chhupane ke liye

aise bhi log bahut sare milenge tum ko
har ghalat kaam kiya nam kamane ke liye

khun-e-dil khun-e-jigar jaan talak nazr kiye
kya nahin de ke gae log zamane ke liye

dao par log laga dete hain har shai apni
apne dushman ko faqat nicha dikhane ke liye

kaun jata hai kisi tapte hue sahra mein
apni tanhai ka ek jashn manane ke liye

koshishen jari hain is daur ki har din ai 'latif'
jitne jangal hain unhen shahr banane ke liye