dard se bhaari hua dil kya hua
kya pata rag rag mein shamil kya hua

mit gae hum jis ko pane ke liye
zindagi se hum ko hasil kya hua

yak-ba-yak sab dagh dil ke dhul gae
main saf-e-qatil mein shamil kya hua

mere qatil ki nigahen khul gain
main zara sa khud se ghafil kya hua

har taraf se mujh ko hi nocha gaya
bas kamane ke main qabil kya hua

log patthar ki taraf raghib hue
aaina madd-e-muqabil kya hua

uth rahi hain us pe 'irfan' ungliyan
apne maqsad mein wo kaamil kya hua