dariya-dili se abr-e-karam bhi nahin mila
lekin mujhe nasib se kam bhi nahin mila

phir ungliyon ko khun mein dubona pada hamein
jab hum ko mangne pe qalam bhi nahin mila

sach bolne ki rah mein tanha hamin mile
is raste mein shaikh-e-haram bhi nahin mila

main ne to sari umr nibhai hai dosti
wo mujh se kha ke meri qasam bhi nahin mila

dil ko khushi bhi had se ziyaada nahin mili
kase ke e'tibar se gham bhi nahin mila