dariya-e-nur-o-rang hai nikhat hai zindagi
paighambar-e-khulus-o-mohabbat hai zindagi

chaho to har qadam pe tumhein manzilen milen
socho to hausla hai shujaat hai zindagi

ye imtiyaz-o-farq ye nafrat hiqaraten
aur mazhab-e-wafa ki shariat hai zindagi

meri nazar nahin nigah-e-shaikh-o-barahman
pasti nahin hai arsh ki rifat hai zindagi

phir sham-e-hijr aaegi sail-e-alam liye
phir ro ke hum kahenge ki furqat hai zindagi

galiyon ki khak chhani to moti mile hain
ye kah ke hum na soe ki rahat hai zindagi

'raje' jo kuchh bhi faisla ahl-e-khirad karen
mere liye to sirf mohabbat hai zindagi