dariya ki rawani mere lahje mein nahin hai
main aag hun pani mere lahje mein nahin hai

rakhna hai mujhe man haqiqat ka jahan mein
so jhuti kahani mere lahje mein nahin hai

jis darja teri yaad mein jalta hai mera dil
us darja girani mere lahje mein nahin hai

kyon lafz mere lab pe thaharte hain abad tak
kya naql-e-makani mere lahje mein nahin hai

chehron ke khadd-o-khal khadd-o-khal hain yani
yaadon ki kahani mere lahje mein nahin hai

dekhun to 'fida' lafz hai ehsas ka hasil
sochun to maani mere lahje mein nahin hai