pate hain kuchh kami si taswir-e-zindagi mein
kya naqsh chhod aae hum dasht-e-be-khudi mein

zinjir-e-agahi se shamshir-e-agahi tak
kya kya maqam aae dil ki sipah-gari mein

ji dekhne ko tarse dekhun to kis nazar se
tufan-e-khirgi hai jalwon ki raushni mein

hasti bajae khud hai ek kar-gah-e-hasti
hum mast-bandagi mein wo banda-parwari mein

dhunde se bhi na pai sadiyon ki justuju ne
shamil thi jo tajalli tartib-e-unsuri mein

wo shai kahan hai pinhan ai mauj-e-ab-e-haiwan
jo wajh-e-sar-khushi thi barson ki tishnagi mein