dariyaon mein rahte hue pyasa to nahin hun
pyasa jo hai muddat se wo sahra to nahin hun

kya jaaniye duniya mein teri hun ki nahin bhi
rahte hue maujud main khoya to nahin hun

wo sath mere chand sitara hai falak har
ai dost shab-e-hijr mein tanha to nahin hun

tum wahm-o-guman jaan ke anjaan na hona
ek thos haqiqat hun main dhoka to nahin hun

chahe to wo sahil se kare ek ishaara
main dub raha hun abhi duba to nahin hun

tha faisla is tark-e-wafadari ka baham
tum bhul gae main tumhein bhola to nahin hun

hairat se bhala kyon mujhe takta hai zamana
ai parda-e-aflak tamasha to nahin hun