darta hun main aksar kahin aisa na samajh le
wo meri tawajjoh ko tamanna na samajh le

ye soch ke danista raha us se bahut dur
maghrur hai dariya mujhe pyasa na samajh le

honton pe hansi hathon mein nashtar hain khabar-dar
koi kisi qatil ko masiha na samajh le

ab main bhi chatanon ki tarah sina sipar hun
tufan-e-hawadis mujhe tinka na samajh le

palkon pe 'sharar' ashk sajaya na karo tum
jugnu na samajh le koi tara na samajh le