darta rahta hun ham-nashinon mein
ek patthar hun aabginon mein

baat karna jinhen nahin aati
aaj wo bhi hain nukta-chinon mein

jo bhanwar ko samajhte hain sahil
aise bhi log hain safinon mein

mohtasib gin le ungliyon hi par
chand hi rind hain kaminon mein

khizr guzre the shahr se apne
hum bhi the ek rah-binon mein

baiat-e-haq ki baat kya karte
hath larzan the aastinon mein

faiz-e-shahr-e-'anis' se 'salik'
sher kahte hain in zaminon mein