dasht-e-hawas mein daudte phirne se kaam tha
khwahish ka asp-e-tez bhi kya be-lagam tha

par phadphadae udne ki himmat na kar sake
bas ek udan bharne mein qissa tamam tha

jo nashsha-e-hayat se sarshaar tha kabhi
hathon mein zindagi ka liye khali jam tha

mulk-e-adam rawana hue rah-rawan-e-shauq
tha koi sust-rau to koi tez-gam tha

kab mustaqil qiyam kisi ka yahan raha
mehman-sara mein aisa kahan ehtimam tha