dastan-e-gham sunaun kis tarah
zakhm-e-dil un ko dikhaun kis tarah

mere rone par lagi hain bandishen
aankh se aansu bahaun kis tarah

wo wafa ke nam se anjaan hai
dosti us se nibhaun kis tarah

pyar se jab uth gaya hai e'timad
jaan ki bazi lagaun kis tarah

kaghazi phulon ka guldasta liye
yar ki mahfil mein jaun kis tarah

pyar ka tohfa diya jis ne mujhe
aise mohsin ko bhulaun kis tarah

'ashna' tha jo mere har raaz se
aise hamdam ko bhulaun kis tarah