dil ke rishte ajib hote hain
dur rah kar qarib hote hain

manzil-e-ishq hai muhaal bahut
har qadam par salib hote hain

sham-e-furqat ke jagne wale
gham ke mare ajib hote hain

aap hain meri zindagi warna
aap kis ko nasib hote hain

fasle se mila karo sab se
dost bhi to raqib hote hain

mehrban jis ke haal par tum ho
bas wahi khush-nasib hote hain

rah-e-ulfat mein 'ashna' aksar
hadse kuchh ajib hote hain