daya se dua se ada se wafa se
mujhe thik kar do kisi bhi dawa se

charaghon ko ghar ke khule mein na chhodo
kahin bujh na jaen waba ki hawa se

suno ja raha hun main dar pe khuda ke
shikayat karunga tumhaari khuda se

hansi jhuti kaise rakhen hum labon par
ki puchhenge hum bhi kisi gham-zada se

hawaen hain kahti diyon se ki tum sab
jaloge bujhoge hamari raza se

saza se nahin koi inkar lekin
saza ye badi hai hamari khata se