dayar-e-ishq mein waiz khirad ka kaam nahin
udhar na bhul ke jaana wo rah-e-am nahin

wo subh subh nahin hai wo sham sham nahin
ki jis mein un ki taraf se koi payam nahin

wo rah-rau hun ki manzil nahin qayam nahin
talash-e-dost mein kuchh qaid-e-subh-o-sham nahin

ye kaif-e-ishq hai waqti surur-e-jam nahin
teri tarah mera naseh khayal kham nahin

nigah-e-qahr ka markaz tha kaun mahfil mein
huzur kahte hain tera koi maqam nahin

ye falsafa ye siyasat ye hikmat-o-danish
kahan kahan meri khatir kamand-o-dam nahin

wo dars dete hain akhlaq ka ab ai 'asi'
salam kijiye jin ko to len salam nahin