dayar-e-shauq mein mujh ko gham-e-sud-o-ziyan kyon ho
jo lut jae na rahon mein wo mera karwan kyon ho

talluq tark kar ke bhi mere dil mein nihan kyon ho
mujhe aazar-e-jaan de kar mera ruh-e-rawan kyon ho

ise chahun use chahun jise chahun kisi ko kya
zamana mujh se kyon uljhe zamana bad-numa kyon ho

nazar chehre pe dali hai magar kuchh sahmi sahmi si
hasinon ka ye roab-e-husn un ka pasban kyon ho

wahi hai kaif-o-sarmasti wahi lutf aur lazzat hai
jahan tera tasawwur hai mai-e-rangin wahan kyon ho

jahan shoalon se phulon ke hasin chehre jhulaste hain
jahan kante panapte hain wo mera gulistan kyon ho

lab-e-gul par tumhin khandan mere dil mein tumhin raqsan
ayan ho is qadar jab tum to aankhon se nihan kyon ho

'habib' ab pyar ki wo chandni raaten nahin baqi
to us pahli nazar ki yaad bhi dil mein nihan kyon ho