de raha hai samar udasi ka
mere dil mein shajar udasi ka

pure tan ko bana ke mitti se
dil banaya magar udasi ka

mujh se ek bar tu sabab to puchh
ai mere be-khabar udasi ka

tu mudawa na kar sakega kabhi
ai mere chaaragar udasi ka

aankh viran hai zehn gum-sum hai
aur dil hai nagar udasi ka

main ne dekha udas nazron se
mausamon par asar udasi ka

shairi be-sabab nahin utri
ye bhi hai ek samar udasi ka

kaif-awar tha ibtida mein ishq
aur baqi safar udasi ka

pahle tum the makin magar ab to
dil hai muddat se ghar udasi ka

kai jamne lagi hai manzar par
ye hua hai asar udasi ka

hijr ki shab ka chand aisa tha
jaise bu nama-bar udasi ka

aankh se ud gaya hai tair-e-naum
khwab mein tha guzar udasi ka