dekh kar log hue shashdar-o-hairan mujhe
tu kahan hai shab-e-gham aan ke pahchan mujhe

qais-o-farhad har ek gam pe aate hain nazar
jaane kis dasht mein laya mera wijdan mujhe

waqt ka hai ye taqaza ki main ab chup na rahun
aap kyun dekh ke hone lage hairan mujhe

ab to har phul bhi kante se siwa lagta hai
gulshan-e-zist nazar aata hai viran mujhe

aap ke jaane se mahsus kiya hai dil ne
zindagi chhod gai be-sar-o-saman mujhe

mushkilen meri tabiat ko hain marghub bahut
zindagi chahiye hargiz nahin aasan mujhe