dekh mohan teri kamar ki taraf
phir gaya mani apne ghar ki taraf

jin ne dekhe tere lab-e-shirin
nazar us ki nahin shakar ki taraf

hai muhaal un ka dam mein aana
dil hai mail butan ka zar ki taraf

tere rukhsar ki safai dekh
chashm dana ki nain guhar ki taraf

hain khushamad-talab sab ahl-e-duwal
ghaur karte nain hunar ki taraf

mah-ru ne safar kiya hai jidhar
dil mera hai usi nagar ki taraf

hashr mein pak-baz hai 'naji'
bad-amal jaenge saqar ki taraf