dekh to kya kamal rakhti hain
teri aankhen sawal rakhti hain

chali aati hain meri khalwat mein
yaaden kitna khayal rakhti hain

samne jis qadar bhi mushkil ho
sab duaen sanbhaal rakhti hain

ishq mein hain saubaten aisi
mujh ko har pal nidhaal rakhti hain

shokh chanchal adaen bhi teri
aap apni misal rakhti hain

tujh se ye duriyan 'figar' aksar
mera jina muhaal rakhti hain