dekhne mein jo lage sham-o-sahar ke sathi
wo to sathi the faqat rahguzar ke sathi

ab kahan hain wo mere ashk pirone wale
ab kahan hain wo mere dida-e-tar ke sathi

tum ko dekha to mere dil ne kaha tum hi to ho
zakhm-e-dil zakhm-e-jigar zakhm-e-nazar ke sathi

is mein kya shak zaman-afroz raha hai ye kalam
hum bhi rahte hain mudam ahl-e-nazar ke sathi

main akeli hi chali jaanib-e-manzil 'afroz'
ham-safar thahre mere sirf safar ke sathi