der se apni aag mein khud hi jalta hun
hun to bhari duniya mein lekin tanha hun

gham ki aag mein tap kar kitna nikhra hun
ab mahsus hua hai main bhi sona hun

baad-e-hawadis aisa udae phirti hai
jaise main ek ped ka tuta patta hun

muddat se jis par koi dastak na hui
yaro main ghar ka aisa darwaza hun

apni barbaadi ka qissa kaise kahun
honton par jo aa na saka wo naghma hun

main auron ke gham ka mudawa kya sochun
main to khud apne hi gham mein uljha hun

yaro jao aur koi dhanda socho
meri wusat mat napo main sahra hun

ab to 'mehdi' mujh ko chain se sone do
socho main kitni raaton ka jaga hun