dhup kyunkar na ho itab-zada
saya saya hai aaftab-zada

nind aana wahan bura kyon hai
jagna bhi jahan ho khwab-zada

hai tabhi se hujum sahil par
jab se tufan hue habab-zada

bahr ki kaifiyat khuda ki panah
qatra qatra hai sail-e-ab-zada

le ke rone se muskurane tak
kya nahin aaj iztirab-zada

kaise aakhir shanakht karte hum
dost dushman the sab naqab-zada

be-maza imtihan-e-zist hua
har sawal aa gaya jawab-zada

khul ke milte 'nihaal' kya jis ki
be-hijabi bhi thi hijab-zada