didani jism-o-jaan ka rishta hai
ye samundar bhi kitna gahra hai

ghar ho ya ho nagar bahar-surat
aadmi to safar mein rahta hai

log to ajnabi nahin lekin
rasta ajnabi sa lagta hai

samne sar-phiri hawaon ke
kab kisi ka charagh jalta hai

dhundhti hain tujhe meri aankhen
jab koi qafila guzarta hai

log to aaine se darte hain
aaina kab kisi se darta hai

koi aalam ho in dinon 'akhtar'
ek chehra nazar mein rahta hai